Gjukanoviç shpall datën e zgjedhjeve parlamentare në Mal të Zi

Presidenti i Malit të Zi, Milo Gjukanoviç, shpalli 11 qershorin datë për mbajtjen e zgjedhjeve të jashtëzakonshme parlamentare.

Vendimi vjen një ditë pasi Gjukanoviç, duke iu referuar Kushtetutës së vendit, nxori dekretin për shpërndarjen e përbërjes së deritashme të Kuvendit.

“Të gjithë janë të vetëdijshëm për krizën e thellë politike dhe institucionale të prodhuar nga mazhoranca e papërgjegjshme. Unë i jam përmbajtur me vendosmëri Kushtetutës për të mos kontribuar në të. Më 20 gusht qeveria u votua mosbesimi, kushtet nuk u plotësuan. Disa nuk i janë përgjigjur konsultimeve, as nuk kanë dorëzuar nënshkrime për të mbështetur kandidatin. Jam i bindur se më e mira ishte shkurtimi i mandatit dhe shpallja e zgjedhjeve”, tha ai.

Qeveria aktuale e Dritan Abazoviç u rrëzua 7 muaj më parë nga një mocion mosbesimi. Qeveria Abazoviç ra pasi nënshkroi Marrëveshjen Bazë me Kishën Ortodokse Serbe në gusht të vitit 2022. Zgjedhjet e fundit parlamentare në Mal të Zi u mbajtën më 30 gusht të vitit 2020.

LEXONI GJITHASHTU:

• Mali i Zi drejt zgjedhjeve të parakohshme, të dielën zgjidhet presidenti
• Mali i Zi shkon në zgjedhje këtë të diel, Gjukanoviç kërkon rikonfirmimin