Gjysmë shekulli në shërbim të arsimit, ndërron jetë Profesor Vehbi Hoti

Është ndarë nga jeta në moshën 81-vjeçare pedagogu i njohur shkodran Prof. Dr. Vehbi Hoti.

Lajmin e ka bërë  me dije djali i tij, në një postim në rrjetet sociale.

“Me hidherim te madh njoftoj ndarjen nga jeta të babës tone të dashtun Prof. Dr. VEHBI HOTI! Qofsh i xhenetit dhe i përjetshëm ndër kujtime babë i dashtun”- tha ai.

Prof.Dr. Vehbi Hoti, një jetë në shërbim të Arsimit Kombëtar

Prof. dr. Vehbi Hoti është një figurë e shquar e arsimit dhe e mendimit pedagogjik shqiptar, të cilëve) u ka kushtuar një jetë të tërë. Që nga viti 1965 e gjer më 2018, plot 53 vjet pa ndërprerje i është përkushtuar arsimit në përgjithësi, posaçërisht arsimit të lartë për 49 vjet si pedagog i Universitetit të Shkodrës “Luigj Gurakuqi”.

Leu në Shkodër më 06.04.1942. Arsimin parauniversitar e kreu në vendlindje. Me 1965 u diplomua në Universitetin e Tiranës në degët Biologji – Kimi dhe Pedagogji.

1 gusht 1965 fillon punën në Sektorin e Pedagogjisë në Institutin e Studimeve dhe Botimeve Shkollore në Tiranë. Në shkurt të vitit 1966 u transferua si pedagog në Institutin e Lartë Pedagogjik (ILP) Shkodër (sot Universiteti i Shkodrës “Luigj Gurakuqi”).

Nga 1977-1981, në kuadrin e asaj që emërtohej “qarkullim”, që në thelb ishte arsye biografike pasi burri i tezes së tij, Hafiz Salih Myftia, ish-Kryemyfti i Shkodrës, me të birin ishin të arratisur politik, largohet nga ILP-ja si mësues në Shkollën e Mesme Pedagogjike “Shejnaze Juka” dhe emërohet metodist në Kabinetin Pedagogjik të Rrethit Shkodër. Në shtator 1981 rikthehet në Universitetin e Shkodrës “Luigj Gurakuqi”, ku edhe qëndron deri në daljen në pension në vitin 2013, duke vazhduar si pedagog i jashtëm gjer në vitin akademik 2018.

Vlerësime

Për punën mësimore dhe atë shkencore ka marrë vlerësime të larta nga organe shkencore dhe shtetërore. Kështu Senati i Universitetit të Shkodrës në vitin 2013 i ka dhënë titullin “Profesor Emeritus”. Nga tre Presidentë të Republikës së Shqipërisë është dekoruar me: “Urdhri Naim Frashëri i Artë” (2001), me titullin “Mësues i Merituar” (1987) dhe “Medalja Naim Frashëri” (1977).

LEXONI GJITHASHTU: 

• Pse po bie euro? Flet ministrja e Financave: Ja zgjidhjet që kemi gjetur
• BE i përsërit Serbisë nevojën për normalizimin e marrëdhënieve me Kosovën