“Gruaja vajti në polici, e përcollën”, psikologia: I thanë erdhi burri para teje

Psikologia Denada Toçe tha në një intervistë për Euronews Albania se shpesh gratë e dhunuara të cilat shkojnë të denoncojnë, përcillen pa marrë mbrojtje, madje ajo tha se nuk janë të rralla rastet ku gratë janë ngacmuar edhe në ambientet e policisë.

Ajo tha se kjo mungesë e ndjeshmërisë është alarmante pasi bënë që gratë të ndihen të pambrojtura në çdo hap.

“Ajo që mua më bën përshtypje është mungesa e ndjeshmërisë që kanë përgjithësisht të gjitha grupet e instancave që merren deri në pikën ku gruaja duhet të ndihet se është e mbrojtur, Në çdo hap që merr gruaja përsipër ajo ndihet e pambrojtur. Ne nuk i kemi të pakta rastet e grave që kanë denoncuar edhe në polici dhe nuk i kanë marrë seriozisht, madje edhe i kanë  ngacmuar.

Raste që kanë qenë pjesë e ngacmimeve seksuale dhe kanë hasur një barrierë të tillë. Raste që kanë qenë pjesë e dhunës dhe i kanë thënë shko në shtëpi te burri jot, sepse burri ka ardhur më parë dhe i ka thënë të mos e dëgjojë. Ka edhe raste të tilla abuzimi që e kalojnë mungesën e ndjeshmërisë”,-tha psikologia Toçe.