Harku opozitar euro-atlantik, PD propozime për ndryshimin e sistemit zgjedhor

Me kërkesë të Partisë Demokratike të Shqipërisë, ditën e sotme u zhvillua tryeza e dialogut me pjesëmarrjen e partive politike dhe aktorëve të rëndësishëm opozitarë.

Gjatë këtij takimi pjesëmarrësit diskutuan rreth “situatës së politike, institucionale, ekonomike dhe funksionimit të cunguar të demokracisë në Shqipëri”.

Gjatë këtij takimi u diskutua dhe u ra dakord sa më poshtë:

1. Emergjenca e hartimit dhe zbatimit të një pakete të plotë reformash ligjore e institucionale për të korrigjuar ndërhyrjet e rënda të ndryshimeve kushtetuese të prillit 2008, të cilat i mohuan të drejtën shqiptarëve të zgjedhin me votë përfaqësuesit e tyre, prishën balancat e pushteteve, polarizuan ekstremisht diskurin politik në vend dhe rrënuan demokracinë funksionale nëpërmjet mungesës së kontrollit të legjislativit.
2. Nëpërmjet Reformës Zgjedhore duhet synuar që të rregullohet përfaqësimi dinjitoz i përfaqësuesve të popullit në Kuvendin e Shqipërisë, bazuar në vlera meritokracie, në mënyrë që ky përfaqësim të kontribuojë në ndërtimin dhe përmirësimin e shtetit shqiptar dhe jo të jetë përfaqësues i pushtetit të radhës dhe i oligarkisë, që investon te pushteti paret e njerëzve që u vjedh nëpërmjet shtetit.
3. Shteti ynë, anëtar i NATO-s, duhet të jetë në standardin më të lartë të anëtarësimit si hapi më i sigurt dhe një urë e sigurt për anëtarësimin e shpejtë në BE.
4. Ky hark opozitar do të ketë në themel të veprimit të vet politik frymën e qartë dhe të pa diskutueshme euro-atlantike, larg pazareve të ulëta politike dhe korruptive që po e mbajnë peng demokracinë dhe shtetin e së drejtës.

Për të realizuar këtë mision për demokracinë dhe shtetin e së drejtës sot është emergjencë kombëtare:  Vota e lirë, barazia e saj sipas Kushtetutës së Shqipërisë;  Listat e hapura; Shqipëria një zonë zgjedhore; Mundësimi i votimit të diasporës; Votimi dhe numërimi elektronik.

LEXONI GJITHASHTU:

• Basha: Listat e hapura s’i kërkojmë për vete, por për shqiptarët
• Basha: Kundër pazarit për të ruajtur marrëveshjen e 2008 mes Ramës dhe Berishës