Historia e kasapit që trashëgon profesionin e stërgjyshit, këshilla për mishin

Drini Kakeli, 33-vjeçari nga Kukësi, rrëfeu në emisionin e “Real People” në Euronews Albania profesionin e pazakontë për bashkëmoshatarët e tij, atë të kasapit.

Kakeli zbuloi se vendosi të bëhet kasap për trashëguar profesionin e familjes që rrjedh që nga stërgjyshi, duke bërë që biznesi i shitjes së mishit të vijojë përgjatë 4 brezave të ndryshëm.

“Jemi brezi i katërt që punojmë kasap, por nuk e kemi njohur stërgjyshin. Gjyshi, babai, unë dhe vëllai punojmë këtu. Një nga arsyet që ne hapëm dyqanin është dhe historia që kemi. Ka shumë klientë që thonë: “Ore unë kam marrë mish tek gjyshi yt mos më bë shumë reklamë”. Unë nga 2018 që merrem me kohë të plotë, por që i vogël kemi ndihmuar babin në rastin e festave, kur ka pasur ngarkesë. Ka ndryshuar shumë si zanat, stili si pritet mishi. Brezi i ri e përmirëson të vjetrin, ndarja atomike atëherë nuk ka ekzistuar më parë.

Gjithmonë e kam ditur që do bëhem kasap. Por në vitin 2018 vendosa të marr profesionin e familjes”, tha ai.

Gjithashtu 33-vjeçari zbuloi dhe një gabim që bënin kasapët më përpara, të cilët e shisnin mishin me gjak.

Sipas Kakelit, mishi përpara se të gatuhet duhet të kullojë për 24-orë për të qenë më i shëndetshëm.

“Gjëja më e rëndësishme është kullimi i mishit. Duhet të kullojë 24-orë. Kjo ka qenë një filozofi e gabuar. Tani e kanë kuptuar njerëzit. Më përpara donin mishin sa është ther, po mos të ishte me gjak të thoshin nuk është i freskët. Ajo është e gabuar, mishi duhet të ri të paktën 24-orë, varur në frigorifer në zero gradë.

Të gjitha lëngjet e tepërta ikin, edhe gjaku, indet zbuten dhe mishi është më i butë më i shëndetshëm. Ka që e kërkojnë me gjak, por unë nuk ua jap. Pasi do vijë do më thotë jo ishte mish i fortë”, tha ai.

LEXONI GJITHASHTU: 

• “Unë si Nusr-Et, edhe ai kasap është”, 33-vjeçari flet për zanatin e tij
• Kasapi zbulon hilet me mishin: Ku duhet të kenë kujdes blerësit