I dënuar për trafik organesh, Anglia refuzon deportimin e ish-politikanit nigerian

Qeveria e Mbretërisë së Bashkuar ka hedhur poshtë një kërkesë të Nigerisë për të deportuar një ish-politikan të lartë nigerian të dënuar për trafik organesh. Ike Ekweremadu, ish-zëvendëspresident i senatit nigerian dhe aleat i ish-presidentit Goodluck Jonathan, po vuan një dënim prej nëntë vjetësh e tetë muajsh pasi u shpall fajtor në vitin 2023 për komplot për të shfrytëzuar një burrë për veshkën e tij.

63-vjeçari së bashku me gruan e tij, Beatrice dhe Dr. Obinna Obeta trafikuan një të ri në Londër me qëllim që t’i merrnin veshkën. Ata po planifikonin t’ia transplantonin veshkën vajzës së Ekweremadu-t, Sonia në një njësi private të një spitali të NHS-së.

Javën e kaluar, një delegacion qeveritar nigerian, i udhëhequr nga ministri i jashtëm, Yusuf Tuggar, u takua me zyrtarë në Ministrinë e Drejtësisë britanike për të diskutuar rastin e Ekweremadu-së. Delegacioni kërkoi deportimin e tij në mënyrë që ai të mund të vuante dënimin e mbetur në Nigeri.

Kërkesë e cila mësohet se është refuzuar.  Beatrice Ekweremadu, e cila u dënua me katër vjet e gjashtë muaj, gjysmën e të cilave e kaloi në paraburgim, u lirua në fillim të këtij viti dhe që atëherë është kthyer në Nigeri.

LEXONI GJITHASHTU:

• Kina lëshon anijen kozmike Shenzhou 22 për të ndihmuar në kthimin e 3 astronautëve
• Muzika gjatë operacionit, studimi: Notat qetësojnë trupin dhe shpejtojnë shërimin