Ilir Meta mesazh ngushëllimi për ndarjen nga jeta të Servet Pëllumbit

Ish-presidenti dhe kreu i Partisë së Lirisë, Ilir Meta, ka publikuar një mesazh ngushëllimi në rrjetet sociale për ndarjen nga jeta të ish-kryetarit të Kuvendit, Prof. Servet Pëllumbi.

Meta e cilëson Pëllumbin si një figurë të shquar në jetën politike dhe institucionale të vendit, me kontribute të rëndësishme edhe në fushën akademike.

Ai thekson se ka pasur kënaqësinë të bashkëpunojë me të në një periudhë të vështirë të tranzicionit në vend.

“Me hidhërim të thellë mora lajmin për ndarjen nga jeta të Prof. Servet Pëllumbit, një figurë e shquar në jetën politike dhe institucionale të vendit”, shkruan Meta.

Meta shprehu gjithashtu ngushëllime për bashkëshorten, djemtë dhe familjen Pëllumbi, si dhe për miqtë e bashkëpunëtorët e tij.

“Të prehet në paqen e merituar. I paharruar kujtimi i Prof. Servet Pëllumbit”, përfundon mesazhin Meta.