Infektimet me mutacionin britanik në RMV, autoritetet shmangin masat shtrënguese

Në një lidhje të drejtpërdrejtë, korrespondenti i Euronews Albania në Maqedoninë e Veriut, Benjamin Arifi tregoi se janë diagnostikuar tre persona me mutacionin e ri të COVID-19, ku njëri prej tyre ka humbur jetën.

“Personi i parë për të cilin ka të dhëna zyrtare se është infektuar me mutacionin e ri të COVID-19 tashmë është shëruar,” – tregoi Arifi.

Ndërkohë që deri në këto momente autoritetet nuk kanë bërë me dije se do të marrin masa të tjera shtrënguese edhe pse virulenca e mutacionit të ri është më e madhe.

Janë kryesisht mjekët e spitaleve private që i bëjnë thirrje autoriteteve të konsiderojnë protokolle të reja sigurie, teksa Ministria e Shëndetësisë në Maqedoninë e Veriut thotë se ka kapacitete të mjaftueshme për të përballuar një valë të re të të infektuarve me COVID-19.

“Në fakt çdo ditë po ngrihen qendra të reja në qytete të ndryshme për pranimin e pacientëve me COVID-19, mirëpo e dhënë shqetësuese është se mbi 3000 punonjës shëndetësor janë infektuar që prej fillimit të pandemisë,” – përfundoi gazetari.

Lexoni gjithashtu:

Viktima e parë në RMV, konfirmohen 3 raste pozitive me variantin britanik të COVID-19