Ish-deputeti Çollaku nuk fitoi betejën me COVID-19, Basha: PD humbi një prej ekspertëve të rrallë!

Kryetari i Partisë Demokratike, Lulzim Basha ka reaguar në lidhje me ndarjen nga jeta të ish-deputetit Bedri Çollaku.

Përmes një postimi në Facebook, Basha i ka shprehur ngushëllime familjes së ish-deputetit.

Kryedemokrati thekson se PD humbi një prej ekspertëve të rrallë. 

“Mësova me hidhërim ndarjen nga jeta të Bedri Çollakut, ish-deputetit të Partisë Demokratike dhe ekspertit të njohur të sistemit bankar. Shpreh ngushëllimet më të ndjera bashkëshortes Virgjinushit, vajzës Genta dhe djalit Erionit. Në këtë ditë të vështirë të humbjes së bashkëshortit të dashur, babait të rrallë dhe të përkushtuar, jemi pranë tyre me mendimin dhe lutjet tona. Me vdekjen e tij miqtë kanë humbur një njeri të mirë dhe profesionist të shquar, Partia Demokratike ka humbur një prej ekspertëve dhe politikanëve seriozë dhe të rrallë. U prehtë në paqe!”, shkruan Basha. 

Ish-deputeti i PD-së Bedri Çollaku ndërroi jetë në moshën 70-vjeçare, pasi u prek nga COVID.

Çollaku ndodhej prej disa ditësh i shtruar në një spital në Turqi ku po merrte kurim por fatkeqësisht nuk arriti t’i mbijetojë dot koronavirusit.