Ish-presidenti i Perusë, Martin Vizcarra dënohet me 14 vjet burg për korrupsion

Ish-presidenti i Perusë, Martin Vizcarra është dënuar me 14 vjet burg pasi gjykata e shpalli atë fajtor për ryshfet ndërsa ishte guvernator i shtetit të Moquegua nga viti 2011 deri në vitin 2014.

Vizcarra, i cili udhëhoqi Perunë nga viti 2018 deri në vitin 2020, u dënua me burgim të menjëhershëm dhe me ndalim të mbajtjes së posteve publike për nëntë vjet. Ai pritet të apelojë vendimin e gjykatës.

Vizcarra pretendon se dënimi i tij u shqiptua si hakmarrje ndaj grupeve rivale politike të krahut të djathtë që kontrollojnë Kongresin, veçanërisht ish-presidentit të ndjerë Alberto Fujimori. Si president, Vizcarra u përplas me këto grupe dhe përfundimisht shpërndau Kongresin.

“Kjo nuk është drejtësi, kjo është hakmarrje. Por ata nuk do të më shtypin”, tha ai.

Një gjykatë penale në Lima, arriti në përfundimin se Vizcarra mori pagesa të paligjshme nga kompanitë në këmbim të dhënies së kontratave për dy projekte të mëdha – një sistem ujitjeje dhe ndërtimin e një spitali – gjatë mandatit të tij si guvernator i Moqueguas.

Vizcarra mori detyrën në mars të vitit 2018 pas dorëheqjes së Pedro Pablo Kuczynskit, i cili në atë kohë ishte kreu i shtetit.

Në nëntor 2020, Parlamenti i Perusë votoi për të shkarkuar Vizcarra-n nga pozicioni i presidentit të vendit për shkak të raportimeve për përfshirjen e tij në skema korrupsioni në Moquegua.

LEXONI GJITHASHTU:

• Pas përmbytjeve Indonezia goditet nga një tërmet i fortë, nuk ka rrezik për cunami
• Trump dënon sulmin ndaj anëtarëve të Gardës Kombëtare si akt terrorizmi