“Ishte shumë e vështirë”, politikani serb: Ika brenda natës, kërkova azil

Politikani serb, Boban Bogdanoviç tha në “Balkan Talks” në Euronews Albania se ishte atmosfera e rënduar politike në Serbi ajo që e detyroi të largohej nga vendi dhe të kërkonte azil.

Ai tha se pavarësisht se ishte vendim shumë i vështirë, duhej marrë për shkak të sigurisë së tij personale dhe të familjes së tij. Opozitari tregoi se azilin politik e ka kërkuar në një vend të Bashkimit Europian dhe nga aty do të vijojë të punojë për përmirësimin e marrëdhënieve mes shqiptarëve dhe serbëve, konkretisht popullit të Kosovës dhe të Serbisë.

“Ka qenë një vendim shumë i vështirë për mua, por ka qenë e vetmja rrugë për të ruajtur jetën time, duke marrë parasysh që Presidenti i Serbisë, Aleksandër Vuçiç bashkë me drejtorin e Shërbimit Informativ të Serbisë (BIA), Aleksandër Vulin dhe me grupin kriminal të cilin e udhëheqin Zvonko Veselinoviç dhe Milan Radojçiç, ka vendosur që me mua të ballafaqohet vetëm në atë mënyrë që të më marrë jetën. Prandaj, unë në momentin e fundit e kam marrë këtë informacion dhe praktikisht brenda natës jam larguar nga Serbia,” – u shpreh Bogdanoviç.

LEXONI GJITHASHTU:

• Deklarata e fortë e politikanit serb: Milan Radojiçiç mund të vritet nga Vuçiç
• Kritiku i Vuçiç ikën nga Serbia: Do kërkoj azil, lashë djepin e të keqes në Ballkan