Kanosi me armë një person, shpallet në kërkim 26-vjeçari në Vlorë! Procedohet shoku i tij

Një 26-vjeçar është shpallur në kërkim nga Policia e Vlorës këtë të enjte, pasi ka kanosur me armë një person.

Sipas raportimeve të policisë, është shpallur në kërkim shtetasi R. L., 26 vjeç. Gjithashtu, është proceduar penalisht shoku i tij, shtetasi M. Ç., 26 vjeç, pasi nuk i është bindur urdhrit të punonjësve të Policisë për të ndaluar automjetin me të cilin dyshohet se u arratis 26-vjeçari.

“Specialistët e Stacionit të Policisë Selenicë shpallën në kërkim shtetasin R. L., 26 vjeç, banues në fshatin Ramicë, pasi kallëzoi shtetasi A. B., se 26-vjeçari e kishte kanosur me armë, për motive të dobëta. Në lidhje me këtë rast, u referuan materialet në Prokurori, ku nisi procedimi penal për shtetasin M. Ç., 26 vjeç, banues në fshatin Bashaj, pasi nuk i është bindur urdhrit të punonjësve të Policisë, për të ndaluar automjetin në të cilin dyshohet se ishte pasagjer shtetasi në kërkim. Punohet për kapjen e shtetasit R. L., si dhe për sqarimin dhe dokumentimin e rrethanave të këtij rasti”, thuhet në njoftimin e policisë.

Materialet procedurale iu referuan prokurorive kompetente, për veprime të mëtejshme.