Kapet në Durrës një 25-vjeçar i kërkuar për trafik droge, pritet ekstradimi në Itali

Një 25-vjeçar nga Shijaku, i shpallur në kërkim ndërkombëtar nga autoritetet italiane për trafikim të narkotikëve, është arrestuar në Durrës gjatë një operacioni të koduar “Night in”.

Operacioni u finalizua nga shërbimet e Drejtorisë Vendore të Policisë Durrës, në bashkëpunim me Forcën e Posaçme Operacionale të Policisë së Shtetit, bazuar në informacione të siguruara nga inteligjenca policore për vendndodhjen e të kërkuarit.

I arrestuari është shtetasi Rando Murataj, 25 vjeç, banues në Shijak, për të cilin Gjykata e Breshias në Itali, me vendimin e datës 31 janar 2025, ka caktuar masën e sigurisë “Arrest në burg”, për veprën penale “Trafikimi i narkotikëve”.

Interpol Tirana, në bashkëpunim me Interpol Romën, është vënë në lëvizje për të përfunduar procedurat e ekstradimit të 25-vjeçarit drejt Italisë.