Karantinimi në hotele, të ardhurit nga Greqia ankohen se nuk paguajnë dot shpenzimet

Për shkak të masave qe janë marrë për të përballuar përhapjen e coronavirus rreth 200 shqiptarë të kthyer nga Greqia janë të karantinuar në disa hotele në qytetin e Korçës. Ata ankohen se nuk i përballojnë dot shpenzimet 

Ky 11-vjeçar që mbërriti dje bashkë me familjen e tij në një nga hotelet në Korçë për t’u karantinuar për 14 ditë, ka treguar vështirësitë me të cilat po përballen, edhe pse nuk u lejua t’i thotë të gjitha nga uniformat blu. Hallin e familjes së 11-vjeçarit e kanë edhe shumë të tjerë, të cilët shprehen se e kanë të pamundur të paguajnë këto shpenzime.

“Ku t’i gjej lekët unë që të paguaj hotelin? S’kam të ardhura, pse nuk më paguan mua Edi Rama. Po ashtu të më lërë të shkoj në shtëpi dhe karantinën e bëj në shtëpi”, tha një qytetare në Korçë.

Janë mbi 200 emigrantë në Korçë e Pogradec të cilët do të duhet të përfundojnë karantinimin. Ndërkohë grupi prej 35 personash që qëndruan për 4 ditë në kufi, një ditë më parë janë larguar drejt shtëpive të tyre,  ndërsa shpenzimet e tyre i mori përsipër Këshilli i Diasporës.