Karantinohen edhe 26 emigrantë të tjerë në Korçë dhe Pogradec

Në 24 orët e fundit 26 emigrantë janë futur në vendin tonë, duke pranuar kushtin për t’u karantinuar në hotel për 14 ditë, sipas informacioneve nga Drejtoria Kufitare dhe e Migracionit. Në total numri i emigrantëve, të cilët janë futur në vendin tonë përmes pikave kufitare në Qafëthanë dhe Kapshticë ka shkuar në 274. Para se të akomodohen në hotele, të gjithë personat i janë nënshtruar një kontrolli mjekësor dhe asnjëri prej tyre nuk ka shfaqur problem shëndetësor.

Emigrantët që janë futur në vendin tonë janë akomoduar në 5 hotele, 3 në Korçë dhe 2 në Pogradec. Të gjitha shpenzimet për qëndrimin në karantinë për këto 14 ditë emigrantët duhet t’i mbulojnë vetë, çfarë ka sjellë dhe pakënaqësi tek një pjesë e tyre, që kanë kërkuar ndihmë nga qeveria, duke e konsideruar si të papërballueshme koston e qëndrimit në hotele.

Që nga nisja e kësaj procedure, asnjë prej këtyre personave nuk ka rezultuar pozitiv me COVID-19.