Vajza e ish-kryeministrit Sali Berisha, Argita Malltezi dhe gazetari Ervis Iljazaj, kanë debatuar në emisionin “Now me Erla Mëhillin” në Euronews Albania, lidhur me punën e SPAK dhe drejtësisë së re në përgjithësi.
Iljazaj tha se sot janë në hetim ose në burg me dhjetëra kryebashkiakë, ministra dhe zëvendëskryeministri, ndërkohë që sipas tij, në kohën e qeverisë Berisha nuk ka pasur arrestime të nivelit të lartë.
Nga ana tjetër Malltezi i hodhi poshtë këto pretendime, duke thënë se në burg sot duhet të ishin kryeministri Edi Rama dhe kryebashkiaku i Tiranës, Erion Veliaj.
Pjesë nga diskutimi:
Malltezi: Shifrat janë ato që thashë unë. 630 raste të çuara për korrupsion me një taskforcë fare modeste pa mjete ekstra siç kanë këta rroga 6 milionëshe në muaj dhe 199…
Iljazi: Në çfarë nivelesh? Në nivele ish-zv.kryeministrash, ministrash? Sepse mund të ketë goditur një numër të madh zyrtarësh, por jo të niveleve të larta.
Malltezi: Kush i ka pasur tenderat në kohën e qeverisë Berisha? Nuk i kanë pasur ministrat. I kanë pasur zv.ministrat dhe sekretari i përgjithshëm. Kush i ka sot? I kanë ministrat, zv.kryeministri, kryeministri e kështu me radhë. Sot ata që kanë bërë tenderat nuk janë në burg. Nuk është Rama në burg, nuk është Veliaj në burg. Duhet të ishin 100 herë në burg me standartin e Ahmetajt.
Iljazi: Sot janë dhjetëra kryebashkiakë që ose janë në burg ose janë në hetim. Dhjetëra. Jo një, jo dy. Ka ish-ministra, zv.kryeministra. Më thoni njëherë në 34 vite tranzicion kur janë arrestuar 5 drejtorë të Bashkisë së Tiranës në atë kohë.
LEXONI GJITHASHTU:
- Gjykata e Lartë rrëzon rekursin e Jamarbër Malltezit
- Çështja “Partizani”, avokatët e Berishës dhe Malltezit paraqiten në GJKKO
