KFOR shton masat për mbrojtjen e Manastirit të Deçanit

KFOR ka shtuar masat për sigurinë ne Kosovë, pas sulmit  në kanalin  e Ibër-Lepencit. Me anë të një njoftimi për mediat, misioni paqeruajtës ka bërë me dije se ka nisur përgatitjet për planin mbrojtës të Manastirit të Deçanit.

Aty thuhet se Batalioni i Komandës Rajonale Perëndimore i misionit KFOR të udhëhequr nga NATO, në bashkëpunim me batalionin rezervë hungarez zhvilluan një stërvitje për zbatimin të planit të mbrojtjes për Manastirin në Deçan.

Stërvitja ka mundësuar përmirësimin e kapacitetit të vendosjes së njësive të reagimit të shpejtë, të kryera me mjete tokësore dhe me helikopterë.

“KFOR-i vazhdon të zbatojë mandatin e tij bazuar në Rezolutën 1244 të Këshillit të Sigurimit të OKB-së të vitit 1999 për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme”, thuhet më tej në njoftim.

KFOR-i punon në koordinim të ngushtë me Policinë e Kosovës dhe EULEX-in , në rolet e tyre përkatëse për garantimin e sigurisë në Kosovë thuhet në mbyllje të njoftimit të misionit paqeruajtës.

LEXONI GJITHASHTU:

• Nënkoloneli i ushtrisë shqiptare shpallet qytetar nderi i Deçanit
• Manastiri i Deçanit regjistron pronësinë e 24 hektarëve tokë