Kirurgu: Mishi i kuq dhe i procesuar, rrezik kryesor i kancerit të zorrës së trashë

Në Shqipëri po rriten frikshëm shifrat e prekurve nga kanceri kolorektal apo i zorrës së trashë siç njihet ndryshe.

Sipas ekspertëve të shëndetit ka një dyfishim të rasteve të reja që diagnostikohen në vit. Madje po haset edhe në mosha të reja.

Fabjan Mustafaj, kirurg i përgjithshëm tha në emisionin GoodMorning Albanians në Euronews Albania se një nga shkaktarët kryesor të shfaqjes së kancerit të zorrës së trashë është konsumimi i tepërt i mishit të kuq dhe të procesuar. Ai tregoi se tek moshat e reja faktori vendimtar është gjenetika.

“Shkaktarët sa i përket ushqimit, dieta me mish të kuq dhe mish të procesuar, kur e pjekim në temperatura e larta, në zgarë. Është edhe arsyeja pse është më i shpeshtë te meshkujt se te femrat se janë më të predispozuar për një dietë më të keqe, me yndyrna. Ajo që e ul mundësinë  e prekjes nga ky kancer është dieta e pasur me fibra, fruta dhe perime, vitamina 2 është shumë e rëndësishme”, tha mjeku.