Kodi Rrugor, shoferëve të rinj nuk do u lejohen makinat me fuqi motorike të lartë

Kryeministri Rama ka shpërndarë mëngjesin e kësaj të premteje me anë të një postimi në Facebook ndryshimet e bëra në Kodin Rrugor për sa i përket lejeve të drejtimit.

Në ndryshimet e miratuara mbrëmjen e djeshme, drejtuesve të mjeteve të drejtimit të kategorisë B, pra të makinave, nuk do u lejohet në dy vitet e para të lëshimit të patentës të drejtojnë mjete me fuqi më të madhe se 55 kë/ton, ndërkohë për makinat hibride elektrike ose Plug-in, kufiri i lejuar i fuqisë, për këta drejtues, do të jetë 65kë/ton duke përfshirë këtu edhe peshën e baterisë.

Ndërkohë afatet e rinovimit të patentave të tipit AM, A1, A2, A, B1, B dhe BE janë rritur nga 10 vite në 15 për të gjithë drejtuesit deri në 70, ndërsa pas moshës 70 konfirmimi i vlefshmërisë së patentës mund të bëhet vetëm pas dorëzimi të certifikatës mjekësore.

Gjithashtu sipas ndryshimeve të miratuara ne Kodin Rrugor, qytetarët të cilëve u është anuluar leja e drejtimit shqiptare për shkak të konvertimit jashtë vendit, do mund ta rimarrin atë pa testim edhe nëse leja e drejtimit e huaj ka skaduar. Ata mund ta rimarrin patentën shqiptare duke e dorëzuar dhe duke hequr dorë vullnetarisht nga patenta e huaj.

Ndërkohë ka një rritje të moshës edhe për ushtrimin e profesionit të instruktorit të autoshkollës e cila nga 65 që është aktualisht do të shkojë 70.

LEXONI GJITHASHTU

• Qindra fluturime anulohen në Gjermani për shkak të grevës në 4 aeroporte
• Del autopsia e vdekjes së atletit shqiptar: Fatale goditja e airbag-ut në qafë