“Koha për rotacion në RMV”, Sejdiu: Eksponentë të BDI në listën e zezë të SHBA

Në prag të zgjedhjeve presidenciale dhe parlamentare në Maqedoninë e Veriut, partitë politike shqiptare janë bashkuar në dy blloqe, njëri i udhëhequr nga Ali Ahmeti dhe BDI-ja me disa parti të tjera, dhe blloku opozitar nën siglën e koalicionit VLEN.

BDI-ja për herë të parë ka vendosur të garojë me një koalicion më të gjerë multietnik, i cili përfshin pakicat si turqit dhe romët. VLEN, nga ana tjetër, me mbështetjen edhe të Vetëvendosjes, synon të rrezikojë pushtetin 20-vjeçar të BDI-së.

Nënkryetari i Lëvizjes Besa, pjesë e koalicionit VLEN, Blerim Sejdiu tha në një intervistë për Euronews Albania se është koha për rotacion politik në Maqedoni të Veriut. Sipas tij, eksponentë të BDI janë në listën e zezë të SHBA.

“Komisioni Evropian po na nxjerr me notë negative dhe më keq se ishim, na ka dhënë mesazhin se me këta shqiptarë në pushtet që 20 vjet na jep një mesazhin që duhet t’i ndryshoni këta. SHBA ka futur në listën e zezë eksponentë që janë në funksione publike të BDI dhe ne duam që këtë mesazh ta marrim shumë seriozisht dhe t’ju tregojmë të gjithëve se me këta aktorë nuk do ketë union evropian dhe reformat që kemi pritur”, tha ai.

LEXONI GJITHASHTU:

• Maqedonci: Armatosja e Serbisë kërcënon rajonin, FSK gati për mbrojtje
• Kandidatët për president të RMV zotohen për zgjedhje të drejta