Kolegji Zgjedhor miraton afatet ligjore për zgjedhjet në Himarë

Kolegji Zgjedhor miratoi të mërkurën afatet ligjorë për procedurat administrative te zgjedhjeve lokale në Himarë, pas ankimit që bëri PS për mungesën e vendimmarrjes nga ana e komisionit rregullator të KQZ javën e shkuar.

Fushata zgjedhore për zgjedhjet e pjesshme për Kryetar në Bashkinë Himarë të 4 gushtit fillon më datë 27 korrik.

“Koalicionet zgjedhore duhet të paraqesin në KQZ kërkesën për regjistrimin si koalicion për zgjedhjet e pjesshme për kryetar në Bashkinë Himarë jo më vonë se ora 12:00 e datës 24.7.2024. KQZ-ja kthen për plotësim dokumentacionin brenda 2 (dy) orëve nga dorëzimi. Partitë politike paraqesin dokumentacionin e korrigjuar brenda orës 18.00 të datës 24.7.2024. Komisioneri Shtetëror i Zgjedhjeve miraton kërkesat për regjistrim brenda 3 (tre) orëve nga ridërgimi i dokumentacionit.

Dokumentet e kandidimit paraqiten në KZAZ jo më vonë se ora 16.00 e datës 25.7.2024. KZAZ-ja bën verifikimin e tyre, jo më vonë se 4 (katër) orë nga paraqitja, dhe në rast se vëren parregullsi, i kthen për plotësim. Dokumentet e plotësuara duhet të riparaqiten jo më vonë se ora 12.00 e datës 26.7.2024. KZAZ-ja merr vendim jo më vonë se 4 (katër) orë nga riparaqitja e tyre.

Fushata zgjedhore për zgjedhjet e pjesshme për Kryetar në Bashkinë Himarë, fillon më datë 27.7.2024”, janë disa nga afatet e miratuara nga kolegji.

LEXONI GJITHASHTU:

• A do ketë kandidat për zgjedhjet në Himarë? Përgjigjet Basha
• Petro Gjikuria prezantohet në Himarë: S’ka më kohë për të humbur, jemi të bekuar