Një koncert recital unik ka kthyer baritonin e mirënjohur shqiptar me famë ndërkombëtare, Gëzim Myshketa, në vendlindjen e tij, në Durrës.

Në një skenë unikë në amfiteatër, këngëtari lirik 42-vjeçar ndërthuri kryevepra të muzikës shqiptare dhe botërore.

Një borxh ndaj qytetit të tij të lindjes, e ka cilësuar vetë artisti këtë rikthim, shoqëruar me emocione të papërsëritshme.

 “Emocionet janë të jashtëzakonshme. Në Durrës, në këtë amfiteatër ku jam rritur ishte një emocion i jashtëzakonshëm. Ishte një borxh, obligim ndaj qytetit, që t’i këndoj Durrësit dhe durrsakëve. Pritëm shumë vite, të mos jetë koncerti i fundit, por fillimi i shumë koncerteve dhe programeve të tjera për qytetin dhe jo vetëm. ‘Masterclass’ ishte një ëndërr e imja. Kam dëshirë ta shndërroj qytetin e Durrësit në një qendër specializimi për të rinj nga gjithë Evropa e bota, që të vijnë këtu në Durrës dhe të perfeksionojnë artin e tyre operistik”,-tha baritoni Gëzim Myshketa.

I shoqëruar nga kori, solistët dhe Orkestra Simfonike e TKOB-së, Myshketa interpretoi një përzgjedhje të larmishme këngësh.

 “Është një program me pak nga të gjitha. Nuk do të ketë vetëm opera. I kam përzgjedhur këto për ta bërë programin artistik të koncertit sa më interesant për të gjithë llojet  veshëve. Si për ata specifikë operistikë, por edhe jo vetëm”,-tha Gëzim Myshketa.

Në fund, koncerti, i cili u ndoq nga dhjetëra qytetarë dhe të ftuar nderi, përfshirë presidentin e Republikës së Shqipërisë, u duartrokit fort nga të pranishmit.

LEXONI GJITHASHTU:

• Çmimi ul prodhimin e grurit. Fermerët e Maliqit: Nuk ka treg, po na mbetet stok
• Rriten shifrat e çifteve pa fëmijë. Shkak kryesor, emigrimi dhe të ardhurat e pakta