Kontrollet dhe sekuestrimi i telefonit, Ajola Xoxa rekurs në Gjykatën e Lartë

Pasi u refuzua nga Apeli i Posaçëm në kërkesën e saj kundër vendimeve gjyqësore të kontrollit të dhjetorit 2024 dhe sekuestrimit të telefonit të saj, Ajola Xoxa, bashkëshortja e kryebashkiakut Erion Veliaj, ka apeluar në Gjykatën e Lartë.

Përmes avokatëve të saj, Xoxa ka bërë rekurs ndaj vendimit të Apelit në Gjykatën e Lartë.

Në këtë gjykatë, Xoxa pretendon paligjshmëri të kontrollimeve dhe kërkon kthimin e telefonit të sekuestruar.

Kujtojmë që Gjykata e Posaçme e Apelit rrëzoi ankimimin e Xoxës kundër vendimit të GJKKO që lejoi kontrollin personal ndaj saj.

Më herët, GJKKO kishte refuzuar kërkesën e Xoxës dhe të vëllait të Veliajt, Arbër Veliaj, për t’u kthyer sendet e sekuestruara gjatë kontrolleve personale dhe në disa ambiente në pronësi të familjes.

Kontrollet e SPAK u kryen më 6 dhjetor, teksa kryebashkiaku Veliaj ndodhej në një vizitë zyrtare në Hamburg. Agjentët e Byrosë Kombëtare të Hetimit sekuestruan celularin e Xoxës dhe ushtruan kontroll në banesën e familjes Veliaj dhe në galerinë e saj, “Harabel”.

Veliaj ka deklaruar se është i hapur për hetimet e SPAK dhe ka shprehur gatishmërinë për të bashkëpunuar.

LEXONI GJITHASHTU:

• Kush e denoncoi Erion Veliajn?! Bregu: Është shitur nga brenda
• Bashkëshortja e kryebashkiakut Erion Veliaj paraqitet në Prokurorinë e Posaçme