Kosova dhe Mali i Zi më afër, Abazoviç: Marrëveshje për shërbimet ajrore

Kosova dhe Mali i Zi kanë nënshkruar një marrëveshje për shërbime ajrore, që mundëson reduktimin e kohës së udhëtimeve dhe synon të ulë çmimet e biletave për udhëtarët.

Nënshkrimi i kësaj marrëveshjeje u bë gjatë vizitës në Kosovë të kryeministrit me mandat teknik të Malit të Zi, Dritan Abazoviç.

Të dy kryeministrat dolën në një komunikim për mediat. Kurti u shpreh se marrëveshja mundëson që korridoret ekzistuese ajrore mes Kosovës dhe Malit të Zi, që deri më tani janë shfrytëzuar për fluturime ushtarake të NATO-s, të përdoren edhe për aviacionin civil.

Marrëveshja që nënshkruam sot ofron mundësi të reja të zhvillimit të aviacionit civil, mundëson shkurtimin e rrugëve ajrore e të kohës së fluturimit për 15 minuta. Një kompani ajrore, që ka fluturuar katër herë në ditë, me këtë marrëveshje lehtësisht mund ta shtojë edhe një fluturim. Pastaj, zvogëlon emetimin e gazrave të dëmshme si dhe ul koston e fluturimeve, që ndikojnë në çmim të biletave për udhëtarët”,

Abazoviç u shpreh se kjo marrëveshje përmirëson atmosferën rajonale.

“Ideja jonë ishte që të krijonim një qasje më të lehtë për qytetarët e të dyja vendeve. Nëse krijojmë një mobilitet, një qasje më të lehtë edhe shkëmbimi i mallrave, njerëzve edhe bizneseve do të jetë shumë më intensiv dhe kjo do të krijojë një atmosferë shumë më të mirë rajonale”, tha Abazoviç.

Gjatë konferencës së përbashkët për media, Abazoviç tha se shteti i tij do të përkrahë Kosovën në aplikimet për anëtarësim në organizata dhe mekanizma ndërkombëtarë dhe theksoi se pavarësisht se ka pasur “disa procese politike” në shtetin e tij, politika zyrtare e Malit të Zi karshi Kosovës nuk do të ndryshojë.

LEXONI GJITHASHTU:

• Abazoviç merr pjesë në hapjen e fabrikës ruse në Nikshiq
• Dritan Abazoviç: Dua të martohem, por s’më japin vajzën