“Kosova dhe Serbia nuk kanë arritur një marrëveshje për targat e automjeteve“. Kështu ka deklaruar kryenegociatori i Kosovës, Besnik Bislimi në një konferencë për mediat, pas përfundimit të takimit në Bruskel me palën serbe dhe të dërguarin e BE-së pë dialogun Miroslav Lajçak.
Sipas tij, nga pala serbe nuk ka gatishmëri për të pasur një zgjidhje që do i shërbente të dyja vendeve, raporton Kosova Press.
“Jo, fatkeqësisht nuk mund të jap lajm të mirë. Grupi ynë sërish është munduar edhe ditën e djeshme që të vijë deri te një draf-propozim që do të na jepej sot për diskutim. Fatkeqësisht ka zero gatishmëri nga pala serbe për t’u dakordësuar për një zgjidhje të mundshme brenda kornizave që i ka paraparë pika e tretë e marrëveshjes e 30 shtatorit”, tha Bislimi.
Sot është afati i fundit për të gjetur një zgjidhje të përhershme për çështjen e targave të automjeteve.
Më herët gjatë ditës së sotme, Miroslav Lajçak tha se takimi ndërmjet kryenegociatorëve për marrëveshjen e targave po shkonte në rrugë të mbarë, por sërish kjo çështje ka mbetur pa zgjidhje.
LEXONI GJITHASHTU
