Gërvalla dorëzon aplikimin për anëtarësimin e Kosovës në Këshillin e Evropës

Ministrja e Punëve të Jashtme dhe Diasporës, Donika Gërvalla dorëzoi të enjtën aplikimin e Kosovës për anëtarësim në Këshillin e Evropës.

Gërvalla e ka dorëzuar personalisht aplikimin në Strasburg.

Këtë e ka bërë të ditur përmes një postimi në Twitter, shefi i kabinetit të ministres Gërvalla, Sharr Jakupi.

🇽🇰 DPM/FM @gervallaschwarz just finished her meetings at the CoE, where she submitted the application in person.

I can confirm: The Government of the Republic of Kosova officially applied for full membership in the Council of Europe. pic.twitter.com/qdMAXjJ38u

— Sharr Jakupi (@sharrjakupi) May 12, 2022

Qeveria e Kosovës zhvilloi të enjten një të jashtëzakonshme mbledhje online gjatë të cilës miratoi nismën për anëtarësimin e vendit në Këshillin e Evropës.

Ndërkohë, presidenti i Serbisë Aleksander Vuçiç ka reaguar duke thënë se “Prishtina ka shkelur brutalisht marrëveshjen e Uasingtonit, marrëveshjen e Brukselit si dhe Rezolutën 1244”

Këshilli i Evropës është organizata më e vjetër ndërqeveritare në Evropë që për qëllim kryesor ka sigurimin e bashkëpunimit dhe unitetit ndërmjet anëtarëve të saj, në lëmin e mbrojtjes së të drejtave të njeriut, demokracisë dhe sundimit të ligjit.

“Të drejtat e njeriut dhe liritë elementare janë të garantuara me Kushtetutën e Republikës së Kosovës, e cila ka ngërthyer në vete edhe konventat e Këshillit të Evropës, duke përfshirë Deklaratën e Përgjithshme të të Drejtave të Njeriut dhe Konventës Evropiane për Mbrojtjen e të Drejtave të Njeriut dhe Lirive Elementare dhe Protokollet e saj”, thuhet në komunikatën e Qeverisë.

Vendimi i miratuar sot obligon Ministrinë e Punëve të Jashtme dhe të Diasporës që të zhvillojë të gjitha procedurat për anëtarësim në bazë të legjislacionit në fuqi.

Që nga pushtimi i Ukrainës nga Rusia në muajin shkurt, në Kosovë janë shtuar zërat  dhe kërkesat për anëtarësim të menjëhershëm të vendit në organizata ndërkombëtare, si masë sigurie për vendin.

LEXONI GJITHASHTU:

• Kurti: Kosova mbështet Procesin e Berlinit, jo iniciativa paralele