Kovaçevski: Nxitësit e dhunës të mos manipulojnë njerëzit për synime politike

Kryeministri i Maqedonisë së Veriut, Dimitar Kovaçevski ka reaguar në lidhje me protestën e djeshme në Shkup, që kundërshtonte propozimin francez për zgjidhjen e kontestit me Bullgarinë.

Përmes një reagimi në rrjetet sociale, Kovaçevski u shpreh se ajo çka ndodhi mbrëmjen e së martës, duke iu referuar dhunës së protestuesve ndaj policisë, nuk është fytyra e vërtetë europiane e Maqedonisë së Veriut.

Ai dënoi ashpër sulmet ndaj policisë teksa u bëri thirrje protestuesve të dhunshëm, që të mos manipulojnë dhe keqpërdorin njerëzit për synimet e tyre politike.

Sipas Kovaçevskit, protestat janë një e drejtë demokratike e çdo qytetari, por dhuna nuk mund të justifikohet me asgjë.

Reagim ka ardhur edhe nga kryeparlamentari Talat Xhaferi, i cili dënoi dhunën dhe huliganizmin në protestë.

“Pasojat nga sjellja e mbrëmshme е egërsuar para Kuvendit. Pranoj dhe mbështes të drejtën e secilit në protestë, të shprehjes së qëndrimit. Vazhdimisht dhe fuqishëm e dënoj huliganizmin, dhunën, nxitjen e urrejtjes sepse ato nuk janë zgjidhja”, shkruan Xhaferi në Facebook.

47 policë janë lënduar nga sulmet e protestuesve mbrëmjen e djeshme në Shkup. Lëndimet kanë ndodhur kur protestuesit hodhën fishekzjarre, bomba tymuese, sende të ndryshme të forta, gurë drejt policisë dhe Kuvendit ku u shkaktuan edhe dëme të shumta materiale.

Edhe në mesin e protestuesve ka të lënduar, ndërsa rreth dhjetë prej tyre janë arrestuar tashmë. Sipas tyre, propozimi francez bën “bullgarizimin” e Maqedonisë së Veriut dhe nuk e njeh gjuhën dhe as historinë maqedonase.

LEXONI GJITHASHTU

• 47 policë të lënduar nga sulmet e protestuesve në Shkup, arrestohen 10 persona
• Tensione në Shkup, protestuesit thyejnë xhamat e ministrisë, lëndohen 4 policë
• Protestuesit në Shkup godasin forcat policore në hyrje të Parlamentit