KQZ propozoi votim elektonik në Durrës dhe Elbasan, PS: Të përfshihet edhe Tirana

Komisioni Qendror i Zgjedhjeve u ka dërguar një shkresë partive politike lidhur me votimin elektronik për zgjedhjet vitit 2025.

Në këtë shkresë qartësohet se mes mundësisë së zhvillimit të votimit elektronik në 5 qarqe, KQZ ka parë të arsyeshme që ky proces të zhvillohet vetëm në dy qarqe në qarkun e Durrësit dhe atë të Elbasanit.

Nga partitë politike të cilave KQZ u ka kërkuar endim, deri më tani kanë reaguar Partia Lëvizja për Zhvillimin kombëtar, e kryesuar nga Dashamir Shehi dhe Partia socialiste e kryesuar nga Edi Rama.

Të dyja këto parti janë dakordësuar me zhvillimin e procesit të votimit elektronik në Durrës dhe Elbasan por kanë kërkuar që votimi elektronik të zhvillohej edhe në Tiranë.

Partia Socialiste ka renditur këto arsye, se përse Tirana duhet të përfshihet në procesin e votimit elektronik:

Tirana, si qarku më i madh në Shqipëri prodhon një numër të konsiderueshëm mandatesh (37 mandate në listat shumëemërore të hapura). Nisur nga ky fakt, fleta e votimit do të administrohej me vështirësi nga votusit dhe do të krijonte pengesa objektive, duke krijuar konfuzion në procesin e votimit.

Nga ana tjetër, votimi elektronik do të sillte lehtësira jo vetëm në procesin e votimit por dhe në shpalljen e rezultatit përfundimtar, i cili në këtë rast do të konsiderohet i drejtë dhe pa pretendime për pavlefshmëri që rrjedhin nga numërimi i votave.

Tashmë votimi elektronik është një procesi i njohur nga qytetarët e Republikës së Shqipërisë. Nisur nga fakti që Tirana, e para ka realizuar modelin pilot të identifikimit, votimit dhe numërimit elektronik në zgjedhjet e vitit 2021, njësia 10, është krijuar një eksperiencë nga qytetarët në këtë proces.

Nga ana tjetër, është fakt se qarku Tiranë, ofron të gjitha kushtet optimale sa i takon burimeve njerëzore dhe infrastrukturës në tërësippër realizimin me sukses të këtij procesi.

Vlen për tu përmendur, afërsia e KQZ me zonat zgjedhore, pasi do të jetë kjo e fundit që do të trajnojë aktorët dhe do të ofrojë shërbimin për realizimin efektiv të këtij procesi.

Nëse nga ana juaj shihet e pamundur përfshirja e tre qarqeve në votimin elektronik, për shkak të kohës që keni në dispozicion deri në dekretimin e dates së zgjedhjeve për Kuvendin e Shqipërisë, ju propozojmë që të miratoni si qark të vetëm, qarkun  Tiranë, ku do të zhvillohet votimi elektronik.

Për të gjitha arsyet e parashtruata më sipër, propozojmë përfshirjen e qarkut Tiranë, krahas qarkut Elbasan dhe Durrës në zhvillimin e votimit elektronik.

Në rast pamundësie të përfshirjes së tre qarqeve, kërkojmë që zhvillimi elektronik të zhvillohet në qarkun e Tiranës.

LEXONI GJITHASHTU:

• LZHK padi në Kushtetuese për Kodin Zgjedhor, Shehi: Duam garë me lista të hapura
• Financimi i paligjshëm i partive, Celibashi: KQZ nuk mund ta kontrollojë