Djali i madh i Cristiano Ronaldos ka marrë thirrjen e tij të parë për ekipin kombëtar të Portugalisë U-15, njoftoi të martën federata portugeze.

Cristiano Ronaldo Jr., 14 vjeç, është përzgjedhur në listën e ekipit që do të marrë pjesë në Turneun Ndërkombëtar Vlatko Markoviç, një kompeticion për të rinjtë që zhvillohet në fund të muajit maj.

Babai i tij, Cristiano Ronaldo, golashënuesi më i mirë në historinë e kombëtares portugeze me 136 gola, e përgëzoi djalin përmes një postimi në Instagram Stories, duke shpërndarë foton e listës së lojtarëve dhe shkruar: “Krenar për ty, bir!”

Ronaldo Jr. do të jetë pjesë e skuadrës që do të përballet me Japoninë, Greqinë, Anglinë dhe më pas në një ndeshje shtesë në Kroaci.

Aktualisht ai luan në ekipin e të rinjve të Al-Nassr në Arabinë Saudite, klub ku luan edhe babai i tij, që u bashkua me skuadrën në dhjetor të vitit 2022.

Në hapat e të atit, Ronaldo Jr. ka qenë pjesë e akademive të të rinjve të Real Madridit, Juventusit dhe Manchester Unitedit, në të njëjtën kohë kur babai i tij ishte pjesë e ekipeve të para të këtyre klubeve. Klipet ku ai imiton festën ikonike të golit “Siu” të Ronaldos janë bërë virale në rrjetet sociale. Sipas raportimeve, gjatë kohës së tij te Juventusi, ai ka shënuar 58 gola me ekipin e të rinjve.

Pas publikimit të thirrjes së tij, llogaria zyrtare e ekipit kombëtar të Portugalisë në Instagram postoi një foto të Ronaldos dhe të birit me mbishkrimin: “ADN-ja e Portugalisë”, të cilën Ronaldo e ripostoi në Instagram Stories.

Cristiano Ronaldo, 40 vjeç, është babai i pesë fëmijëve.

LEXONI GJITHASHTU:

• Inter mposht Barcelonën dhe shkon në finalen e Champions League
• Oferta marramendëse e Al Nassr për Ronaldon: 500 mijë € në ditë dhe aksione në klub