Kreu i ILD Artur Metani vizitë në SHBA, takime në Departamentin e Drejtësisë

Inspektori i Lartë i Drejtësisë Artur Metani zhvilloi një vizitë zyrtare në Shtetet e Bashkuara të Amerikës,  organizuar nga OPDAT (Zyra Transoqeanike për Zhvillimin, Ndihmën dhe Trajnimin e Prokurorisë) e Departamentit të Drejtësisë të SHBA-së. Z. Metani zhvilloi takime të rëndësishme me përfaqësues të Zyrës së Inspektorit të Përgjithshëm në Departamentin e Drejtësisë, si dhe me përfaqësues të OPDAT.

Zyra e shtypit bëri me dije përmes një njoftimi se “në zyrën e OPDAT,  Metani u takua me Zëvendësdrejtorin George Huber dhe Drejtoren Rajonale për Evropën Pragna Soni. Gjatë këtyre takimeve Inspektori i Lartë i Drejtësisë u shoqërua nga Këshilltari Ligjor Rezident i OPDAT në Shqipëri, Dave Backman, si dhe nga inspektori z. Periand Teta.

“Diskutimet u përqendruan në rritjen e standardeve të integritetit dhe profesionalizmit në sistemin gjyqësor në Shqipëri, si elemente thelbësore në luftën kundër krimit të organizuar dhe korrupsionit. Në këtë kontekst, Inspektori i Lartë i Drejtësisë ndau pikëpamje mbi rëndësinë e forcimit të mekanizmave të inspektimit dhe llogaridhënies për gjyqtarët dhe prokurorët, si dhe nevojën për të garantuar standarde të larta etike dhe profesionale.

Metani theksoi gjithashtu se funksionimi i një sistemi gjyqësor të pavarur, të paanshëm dhe të përgjegjshëm përbën një element kyç në garantimin e shtetit të së drejtës dhe forcimin e demokracisë në Shqipëri. Bashkëbiseduesit vlerësuan progresin e arritur dhe shprehën gatishmërinë për të vijuar mbështetjen dhe bashkëpunimin ndërinstitucional në drejtim të asistencës teknike, si dhe shkëmbimit të praktikave më të mira”, theksohet në njoftim.