Kriset marrëdhënia e Uzunit me Granadën, alternativa e re për futbollistin shqiptar

Marrëdhënia mes Uzunit dhe Granadës është tipike si ato të dashurisë, ku gjithçka duket perfekte, por vjen një moment i caktuar ku ka një krisje, e cila mund të çojë në ndarje. Si në filma duket, por është reale, 29-vjeçari mund të largohet nga ekipi që militon në La Liga 2, pasi kushtet e vendosura prej tij nuk po plotësohen. Sulmuesi kërkon firmosjen e një kontrate të re, e cila do të përkthehej në të ardhura më të larta, pasi ai paguhet më pak se gjysma e rrogës që merr lojtari më i vlerësuar i kësaj skuadre.

Pra, e thënë ndryshe, futbollisti kuqezi, i cili është ndër më kyçët për ekipin spanjoll, paguhet shumë më pak nga futbollistë të cilët nuk kanë dhënë aq shumë sa ai në fushë. Kjo ka shkaktuar pakënaqësi dhe Myrto Uzuni u ka bërë të ditur drejtuesve që, nëse paga nuk rritet, largimi është opsioni i vetëm.

Mediat në Spanjë përmendin gjithashtu interesin që vjen nga MLS për beratasin, ku oferta e parë është nga FC Austin. Klubi amerikan i ofron 29-vjeçarit afro 2 milionë dollarë pagë vjetore, një shumë e majme në krahasim me kapacitetin e spanjollëve. Po ashtu, këta të fundit do të përfitojnë mjaftueshëm për kartonin e tij, që sipas amerikanëve vlerësohet më tepër se 5 milionë dollarë.

LEXONI GJITHASHTU:

• Myrto Uzuni vendos rekord, shënuesi më i mirë i huaj në historinë e Granadës
• Rrëfehet Uzuni: Te Granada më adhurojnë, në Kombëtare dua të luaj si sulmues i dytë