Frikë për përshkallëzim të konfliktit, Izraeli: Gati të përballemi me Iranin

Agjencia amerikane për Zhvillimin Kombëtar deklaroi se kriza e urisë është tashmë e pranishme në veri të Rripit të Gazës.

Organizata e rendit krizën në nivelin e pestë të pasigurisë ushqimore, që e klasifikon atë si “katastrofë”. Kjo do të thotë se 70 për qind e popullsisë në veri të Gazës, ose 210 mijë persona, kanë mungesë ekstreme ushqimi.

Ndërkohë, njolla e luftës rrezikon të përhapet për shkak të përshkallëzimit mes Izraelit dhe Iranit. Kreu i Komandës Qendrore Amerikane, gjeneral Erik Kurilla mbërriti në Izrael për të diskutuar situatën.

Kryeministri Netanyahu foli për përgatitjen e skenarëve sfidues nga zona të tjera, edhe pse shprehu gatishmërinë për t’u përballur me Iranin.

“Një sulm nga territori iranian do të ishte një provë e qartë e synimeve të Iranit për të përshkallëzuar situatën në Lindjen e Mesme. Në muajt e fundit, ne kemi përmirësuar dhe avancuar kapacitetet tona ofensive dhe do të dimë se si të veprojmë”, tha Daniel Hagari, zëdhënës i ushtrisë izraelite.

Por përpjekjet e qeverisë izraelite nuk janë mbështetur nga hebrenjtë ultra-ortodoksë, të cilët kanë kundërshtuar ashpër përfshirjen e tyre në shërbimin ushtarak. Të enjten, prokurori i përgjithshëm i Izraelit informoi kabinetin qeveritar se nuk ka baza ligjore për të përjashtuar ultra-ortodoksët nga rekrutimi.

LEXONI GJITHASHTU:

• Macron: Franca e angazhuar për integrimin e Shqipërisë e Ballkanit Perëndimor në BE
• Turqia kufizon eksportet në Izrael, shkak Gaza