Hans Peter Jost është një fotograf zviceran. Ai, në fillim të viteve 90’ të shekullit të kaluar, menjëherë pas ndryshimeve demokratike që ndodhën në Shqipëri, kishte bërë shumë udhëtime nëpër vendin deri atëherë, të panjohur, për të zbuluar pamje nga realiteti i rëndë nëpër të cilin po kalonte Shqipëria.

Ai ka realizuar tashmë edhe disa libra në të cilët ka përmbledhur fotografi të zgjedhura nga kjo periudhë. Libri i tij “Albania in between” ka fituar disa çmime të rëndësishme në hapësirën gjermane, për kualitetin e faqosjes, si libër fotografish.

Një nga “kult fotografitë” e kësaj periudhe, ku shihet një grup fëmijësh në një gjendje të mjerueshme, diku në veriun shqiptar, është bërë shkas që rreth 30 vite më vonë Jost të realizojë një film dokumentar. Me titullin “Ku jeni ju” (Where are you), autori pasqyron, tani përmes gjuhës filmike, përpjekjet e tij për të gjetur ku janë dhe ç`bëjnë sot, këta ish-fëmijë, ndërkohë që në Shqipëri kanë ndodhur ndryshime të mëdha.

Filmi u shfaq për herë të parë në kuadrin e aktivitetit PHOTOSTREAM OLTEN #52, që mbahet në Galicia Bar Olten, Unterführungsstrasse.

LEXONI GJITHASHTU:

• Ndahet nga jeta fotografi legjendar francezo-amerikan, Elliott Erwitt ishte 95 vjeç
• ‘’Kur era vajton luftë’’, ekspozita e fotografit Enri Canaj