Kufizimet e reja kundër COVID-19 në RMV nxisin mijëra qytetarë për t’u vaksinuar

Kufizimet e fundit në Maqedoninë e Veriut që ndalojnë hyrjen e qytetarëve të pa vaksinuar nëpër bare e restorante, nëpër qendra tregtare e shumë institucione të tjera, kanë nxitur mijëra qytetarë për të marrë vaksinën kundër COVID-19.

Në një prej pikave më të mëdha të vaksinimit në Shkup, dukeshin turma të mëdha të qytetarëve të cilët organizoheshin në radhë për të marrë dozën e parë të vaksinës.

Qytetarët në Shkup thonë se nuk janë të sigurt për efikasitetin e vaksinës, megjithatë e rekomandojnë pasi “është për të mirën e njerëzve”.

Por, shumica e personave thanë se po merrnin dozën e parë të vaksinës për të shmangur kufizimet e jo për të mbrojtur shëndetin.

“Për shkak të kufizimeve. Në rregull jam, skam ndonjë problem”, u shpreh një qytetar.

Pas vendosjes së kufizimeve numri i të vaksinuarve në ditë në Maqedoninë e Veriut ka shkuar mbi 12 mijë që vaksinohen për herë të parë. Numri total i vaksinave të aplikuara në Maqedoninë e Veriut është 1 milion e 115 mijë e 988.

Një ndër kufizimet që do të hyjnë në fuqi nga një shtatori është edhe ndalesa për hyrje dhe dalje nga shteti për ata që nuk janë të vaksinuar me të paktën një dozë vaksine ose nëse nuk e kanë kaluar virusin.

LEXONI GJITHASHTU:

• Përse ekspertët po sugjerojnë ‘doza të treta’ të vaksinës anti-COVID pas 8 muajsh?
• Mali i Zi ashpërson masat, test COVID-i ose certifikatë vaksinimi për të kaluar kufirin