Kultivimi i kanabisit për qëllime mjekësore në Maqedoninë e Veriut do të legalizohet

Qeveria e Maqedonisë së Veriut i dha dritë jeshile idesë për kultivimin e vajit të kanabisit për qëllime mjekësore. Siç njoftuan nga pres qendra e Qeverisë, tashmë është përgatitur edhe teksti i propozim ligjit që më pas duhet të kalojë në Kuvend.

Sipas Qeverisë, me këtë rregullim ligjor do të parandalohet keqpërdorimi i vajit për përpunimin e drogave që kërcënojnë shëndetin dhe jetën e njerëzve, dhe shteti do të ketë kontroll mbi prodhimin e kësaj bime.

Kanabisin do të mund ta kultivojnë vetëm kompani që do të kenë licencë nga Ministria e Shëndetësisë, por edhe ministria paraprakisht do të merr pëlqim nga Qeveria. Çdo ndryshim i pronësisë së kompanisë që do të merr licencë për kultivim, doemos do të duhet të tregohet në Qeveri.

Kultivuesit e kanabisit do të duhet që dhjetë për qind nga fitimi i tyre t’ia japin shtetit. Këto para, do të shfrytëzohen për  furnizim me ilaçe për sëmundje të rralla dhe për prioritete të tjera në sistemin e shëndetësisë.

Një pjesë e parave do të përdoren edhe për financimin e Agjencisë për kontroll të procesit të përpunimit dhe shitjes së vajit të kanabisit për qëllime mjekësore dhe shkencore, që me implementimin e ligjit, do të duhet që të formohet.

Propozim ligji do të vendoset edhe në debat publik.