Kushi mohon mbylljen e shkollave vetëm për mungesë të ngrohjes

Disa aktivistë kanë protestuar sot para Ministrisë së Arsimit duke kërkuar sigurimin e kushteve minimale në shkollat e vendit.

Në mënyrë simbolike, duke vendosur disa ngrohëse përpara godinës së ministrisë, ata kanë ngritur shqetësimin për mungesën e ngrohjes në shumë shkolla të vendit, që solli edhe vendimin për pezullimin e mësimit 3 ditët në vijim.

“Vendi ynë ka mbyllur shkollat dhe nuk përballon dot as ngrohjen e tyre. Në Dibër, në Maqellarë pa ujë pa ngrohje, nxënësit marrin dru për të ngrohur klasën”, u shpreh Migen Qiraxhi, aktivist,

Por ministrja e Arsimit Evis Kushi mohon se pezullimi i mësimit vjen si pasojë e mungesës së ngrohjes në shkolla.

“Kjo lidhet edhe me rrugën që duhet të bëjnë nxënësit për në shkollë. Jemi informuar se në shumë shkolla kanë ngrirë edhe botet e ujit. Nuk janë shumë shkollat që nuk kanë ngrohje. Nuk ka lidhje vetëm me sistemin e ngrohjes së shkollave, por edhe me elemente të tjerë”, u shpreh ministrja.

Ministrja e Arsimit thotë gjithashtu se vendimi për mbylljen e shkollave nuk është ndikuar nga situata e COVID-19 në shkolla, pavarësisht rritjes së infektimeve.