Kushi nënshkruan marrëveshje për Albanologjinë me universitetin prestigjoz në Mynih

Ministria e Arsimit dhe Sportit tashmë ka një marrëveshje të re me Universitetin “Ludëig-Maximilians” në Mynih, për mbështetjen e mësimdhënies dhe hulumtimit shkencor në degën e studimeve të Albanologjisë.

Lajmin e bëri të ditur Ministrja e Arsimit dhe Sportit Evis Kushi nëpërmjet një postimi në rrjete sociale.

“Jam entuziaste për nënshkrimin e marrëveshjes së re me Universitetin e Mynihut ‘Ludëig-Maximilians’ Gjermani, për mbështetjen e mësimdhënies dhe hulumtimit shkencor në Albanologji, me qëllim ruajtjen dhe vijimësinë e programit të studimit ‘Master në Albanologji’ në këtë universitet” – shkruan Ministrja Kushi.

Kjo marrëveshje lidhet për një afat të pakufizuar dhe nënshkrimi i saj përkon me fillimin e studimeve për ciklin Master për sezonin pranveror.

I pranishëm në ceremoninë e nënshkrimit, ishte edhe drejtuesi i Katedrës së Albanologjisë në këtë universitet në Mynih, njëherësh lektor i gjuhës shqipe, Prof. Dr. Bardhyl Demiraj.

Aktualisht, në degën e Albanologjisë janë të regjistruar 11 studentë, ndërkohë që gjuhën shqipe e studiojnë aktualisht edhe 30 studentë të degëve të tjera.

LEXONI GJITHASHTU: 

• Burri i 37-vjeçares s’ishte në shtëpi, punonte taksist, detaje nga vrasja në Shkozë
• Ish-zv.kryeministri serb: 5 shtetet mosnjohëse s’do ta njohin Kosovën edhe pas Ohrit