Kushtetuesja kërkon praninë e Veliajt në seancë, njofton Drejtorinë e Burgjeve

Gjykata Kushtetuese ka dalë me një njoftim lidhur me seancën e 31 tetorit ku Erion Veliaj ka kundërshtuar vendimin për shkarkimin e tij nga detyra e kryebashkiakut të Tiranës. Gjykata Kushtetuese thekson se ka njoftuar Veliaj për datën dhe orën e zhvillimit të seancës.

Gjithashtu Kushtetuesja ka njoftuar SPAK dhe Drejtorinë e Përgjithshme të Burgjeve për marrjen e masave për shoqërimin e Veliaj në seancë.

“Në përgjigje të interesit të shprehur nga ana mediave si dhe në kuadër të transparencës dhe shpërndarjes së informacionit publik, më poshtë gjeni informacionin e dhënë nga ana e Gjykatës Kushtetuese.

Gjykata Kushtetuese, bazuar në nenet 21, pika 1 dhe 38, pikat 1 dhe 2 të ligjit nr. 8577, të ndryshuar, me shkresën nr. 28 (E) 2025 Regj.Them, datë 09.10.2025, ka njoftuar kërkuesin Erion Veliaj për datën dhe orën e zhvillimit të seancës plenare publike në 31.10.2025.

Gjithashtu, ju informojmë se Gjykata Kushtetuese me shkresën nr. 28 (E) 2025 Regj.Them, datë 13.10.2025, ka njoftuar Drejtorinë e Përgjithshme të Burgjeve duke e vënë në dijeni për datën dhe orën e zhvillimit të seancës plenare publike, si dhe marrjen e masave për shoqërimin e zotit Erion Veliaj në seancën plenare publike në rast se do të shprehej vullneti për marrjen pjesë personalisht në gjykim.

Në vijim, në datën 20.10.2025, pas shprehjes së vullnetit të kërkuesit, Gjykata ka njoftuar edhe Prokurorinë e Posaçme kundër Korrupsionit dhe Krimit të Organizuar në lidhje me sa më sipër”, njofton Gjykata Kushtetuese.

Erion Veliaj ka kundërshtuar në Gjykatën Kushtetuese shkarkimin e tij nga detyra si kryebashkiak i Tiranës. Ai argumenton se shkarkimi pa shkelje të rëndë të provuar është i paligjshëm dhe antikushtetues.

Veliaj u shkarkua më 25 shtator nga detyra e kryetarit të Bashkisë së Tiranës me shumicë votash nga Këshilli i Ministrave. Për shkarkimin e tij votuan Partia Socialiste, Partia Demokratike, Nisma Thurje dhe PS Nisma. Ndërkohë, Lëvizja për Zhvillim Kombëtar dhe Bindja Demokratike nuk morën pjesë në votim.

LEXONI GJITHASHTU:

• Shtyhet seanca paraprake për Erion Veliajn, shkak mungesa e një prej avokatëve
• Ankimi i Veliajt, Kushtetuesja thërret Presidentin në seancën e 31 tetorit