KZAZ nuk merr vendim për numërimin e votave nga Greqia, çështja i kalon KQZ

Komisioni i Zonave të Administrimit Zgjedhor (KZAZ) nuk ka marrë një vendim për vijimin e numërimit të votave të diasporës nga Greqia, duke ia lënë kështu këtë përgjegjësi Komisionit Qendror të Zgjedhjeve.

Partia Socialiste i është drejtuar me një kërkesë zyrtare KQZ-së, duke kërkuar marrjen e masave për të vijuar në mënyrë të rregullt procesin e numërimit dhe vlerësimit të zarfeve “B” të kontestuara nga grupet e numërimit. PS thekson se mungesa e vendimmarrjes nga KZAZ po pengon përparimin e procesit dhe kërkon që Komisioneri Shtetëror i Zgjedhjeve, Ilirjan Celibashi, të marrë një vendim për të garantuar përmbylljen e numërimit në përputhje me udhëzimet ligjore.

Nga ana tjetër, Partia Demokratike kërkon nga KQZ qartësi dhe transparencë duke i kërkuar Komisionit Qendror të Zgjedhjeve që të sigurojë dokumentacionin teknik dhe ligjor që vërteton se votat e diasporës janë marrë dhe dorëzuar nga vetë zgjedhësit. PD ngrit shqetësime serioze për integritetin e procesit dhe akuzon Partinë Socialiste për manipulime gjatë numërimit.

Në këtë kontekst, çështja e vijimit të procesit të numërimit të votave të diasporës nga Greqia mbetet e pazgjidhur, ndërsa vendimi përfundimtar pritet të merret nga Komisioneri Celibashi.

LEXONI GJITHASHTU:

• Celibashi apel të fortë numëruesve: Mos cenoni votën e kandidatëve, do ndëshkoheni
• PD kërkesë KQZ: Tregoni dokumentet që emigrantët e kanë marrë e dorëzuar vetë votën