Ligji për zonat e mbrojtura| Trajçe: Ditë e zezë për natyrën, dëme të pakthyeshme

Në emisionin Review në Euronews Albania, u analizuan këtë të shtunë ndryshimet në ligjin për zonat e mbrojtura.

Në një prononcim për emisionin, drejtori i Qendrës për Ruajtjen dhe Mbrojtjen e Mjedisit Natyror në Shqipëri (PPNEA), Aleksandër Trajçe, e cilësoi ditën që u votua ligji si ditën më të zezë për natyrën në Shqipëri.

Ai tha se ligji i ri lejon ndërtimin e strukturave të pakthyeshme me beton brenda të gjitha Zonave të Mbrojtura. Sipas tij kjo i hap rrugë dëmtimeve të pakthyeshme të mjedisit dhe atyre zonave.

“Me ndryshimet në ligj ajo që ndodhi është që ne mund të kemi zhvillime intensive për sa kohë që ato argumentojnë që bëhen për shkak të turizmit të ekselencës dhe çdo lloj infrastrukture që ndihmon këtë turizëm.Sa kohë do të ketë struktura dhe do të hidhet beton, ai quhet ndryshim permanent pasi nuk ndryshohet më. Është shqetësuese dhe paragrafi infrastrukturë shoqëruese, pasi e lë evaziv.

Për ta bërë më të kuptushme për publikun, nëse një mega-resort që do të ndërtojë në një zonë të mbrojtur, nëse i duhet ujë 24-orë mund t’i jepet leje për të ndërtuar një digë, apo një rezervuar. Mund t’i jepet leja për një gjenerator gjigand, ose për një autostradë për të çuar turistët në resort. Mund të jepet leja për një aeroport dhe ne e kemi një problematikë tashmë të nxehtë me aeroportin e Vlorës i cili po ndërtohet në një zonë të mbrojtur.

Praktikisht i hapet rruga çdo lloj zhvillimi intensiv brenda Zonave të Mbrojtura dhe kjo për ne është dita më e zezë për mbrojtjen e natyrës”, tha Trajçe.

LEXONI GJITHASHTU:

• Ishulli i bunkerëve dhe tuneleve, sa lekë do “blihet” Sazani
• Ligji për Zonat e Mbrojtura, inxhinieri: Mjafton 1 shkrepse me vete dhe ndërton kudo
• Investimet strategjike, Çaushaj: Po ndahen asetet kombëtare! A përfitojnë qytetarët?