Tensione, protestuesit godasin me molotovë kryeministrinë! Policia: Mos godisnin efektivë

Protestuesit para selisë së Partisë Demokratike organizuan një sulm me fishekzjarre drejt forcave policore që ndodheshin në urën e Rrugës së Elbasanit.

Efektivet e policisë reaguan menjëherë, duke përdorur gaz lotsjellës dhe ujë për të shpërndarë turmën dhe për të rikthyer kontrollin në zonë.

Për shkak të tensioneve të ndodhura gjatë protestës së PD-së, një nga protestuesit ka humbur ndjenjat. Nga informacionet paraprake mësohet se i riu nuk është ndjerë mirë për shkak të gazit lotsjellës, pasi nuk ishte i pajisur me maskë.

Të riut iu dha ndihma e parë nga protestuesit e tjerë, ndërkohë që po transportohet tek Trauma.

Nga ana tjetër, protestuesit bashkë me drejtuesit demokratë po afrohen tek selia e PD-së, nga ku kanë shprehur se do vijojnë qëndresën e tyre.

Pas largimit nga sheshi para Kryeministrisë, protestuesit u drejtuan drejt godinës së Parlamentit të Shqipërisë, ku situata u tensionua menjëherë.

Një Molotov u hodh drejt forcave policore, çka shkaktoi reagimin e menjëhershëm të tyre. Policia përdori autobotet me ujë, gaz lotësjellës dhe bomba zhurmuese për të shpërndarë turmën dhe për të rikthyer kontrollin në zonë ndërkohë që protesutesit së bashku me deputetët e PD-së dhe kreun e saj Berisha vijojnë marshimin në zonën pranë parlamentit.

Menjëherë pas përfundimit të fjalës së Sali Berisha në protestën e 20 shkurtit para Kryeministrisë, situata u tensionua shpejt. Disa persona hodhën fishekzjarre dhe molotov.

Kordoni i policisë u tërhoq menjëherë, ndërsa autobotet me ujë filluan të përdorin ujin me piper për të shpërndarë protestuesit dhe për të rikthyer kontrollin në shesh. Protestuesit u ftuan më pas të shkojnë drejt parlamentit.

Ujë me piper u hodh dhe drejt liderit demokrat Sali Berisha i cili ndodhej në podiumin e protestës.

Është ecja e zakonshme e kreut të PD që paraprin çdo protestë që opozita organizon në Bulevard. Këtë herë Berisha shoqërohet nga Sekretari i Përgjishëm, Flamur Noka, nënkryetarët e Partisë Luçiano Boçi, Gazmend Bardhi, Agron Gjekmarkaj, por dhe drejtues të tjerë të lartë të PD. Gjithashtu një grup të rinjsh e shoqërojnë në këtë rrugëtim që Berisha bën nga selia e PD, drejt kryeministrisë nga ku është ngritur podiumi ku do mbajnë fjalën.

Skenari i protestës është i ngjashëm, por mbetet për tu parë deri në mbyllje të saj.

Berisha pritet të jetë folësi kryesor i protestës. Efektivët janë në terren, ndërsa godina e kryeministrisë është blinduar me veshje metalike dhe gardh metalik.

Ka nisur protesta e kësaj të premteje e thirrur nga Partia Demokratike për datën 20 Shkurt. Qindra protestues janë mbledhur në shesh, ndërsa pritet që të nisin fjalimet e para nga drejtuesit e opozitës.

Kreu i Partisë Demokratike, Sali Berisha, ka dalë nga selia blu i shoqëruar nga mbështetës dhe simpatizantë, duke iu bashkuar marshimit drejt vendit ku po zhvillohet tubimi.

Kjo është protesta e katërt e organizuar nga Partia Demokratike në muajt e fundit. Sipas njoftimit zyrtar të Policisë së Tiranës, tubimi i sotëm nuk është marrë në konsideratë për t’u siguruar nga ana e policisë sipas procedurave standarde. Megjithatë, në terren raportohet se janë angazhuar rreth 1600 efektivë për të monitoruar situatën dhe për të garantuar rendin publik.

Në një deklaratë për mediat përpara nisjes së protestës, Berisha nuk dha detaje mbi skenarin apo formatin e tubimit të sotëm.

Duke raportuar nga selia e Partisë Demokratike, gazetari Ardit Hoxha dha detaje nga organizimi i protestës së opozitës. Ai theksoi se, pas përvojave të mëparshme me përdorimin e gazit lotsjellës nga policia, të gjithë deputetët e PD-së që do të marrin pjesë janë pajisur me maska kundër gazit.