Lukashenko i premton besnikëri Kinës, lideri bjellorus në Pekin, takim me Xi Jinping

Presidenti bjellorus Alexander Lukashenko përshëndeti “miqësinë e besueshme” të vendit të tij me Kinën, pasi bisedoi kokë më kokë me presidentin Shi Xhinping gjatë vizitës së dytë në Pekin brenda këtij viti. Lukashenko mbërriti në Kinë të dielën, në kuadër të një vizite që do të zgjasë të paktën 2 ditë.

“Zhvillimi gjithëpërfshirës i bashkëpunimit strategjik mes Bjellorusisë dhe Kinës përcaktohet nga uniteti i ideologjisë sonë dhe nga zhvillimet e ndryshme që po verifikohen sot nëpër botë”, është shprehur Lukashenko.

Nga ana tjetër lideri kinez vuri në dukje se në botën moderne po ndodhin ndryshime titanike dhe përmes aleancave, përfshirë atë me Bjellorusinë, Kina synon të përforcojë bashkëpunimin strategjik për të krijuar një fat të njëjtë për njerëzimin.

Më tej dy liderët shkëmbyen një seri dhuratash me njëri-tjetrin dhe së bashku ndoqën një ndeshje hokeji, sport pas të cilit Lukashenko është i apasionuar.