Man City shkëlqen në derbi, mposht “djajtë e kuq” me shifrat goleadë

Derbi i parë i qytetit është fituar nga Mançester Siti që mposhti djajtë e kuq në shtëpi në një duel të dominuar plotësisht. Qytetarët realizuan 3 gola, ndërsa heroi ishte padyshim Haaland.

Manchester City ka dalë si triumfator nga derbi i parë i qytetit, duke i shkaktuar një tjetër humbje “djajve të kuq” në këtë nisje të sezonit të Premier League. Një përballje mjaft interesante ajo në Etihad, ku njeriu që bëri diferencën ishte Erling Haaland me një dygolësh. Sfida u zhbllokua në minutën e 18, ku Foden devijoi saktë me kokë një top, që u ndal në rrjetë.

Në fraksionin e dytë, sulmuesi norvegjez shënoi dopietë duke hipotekuar fitoren 3-0. Debutim fantastik edhe për Donnarumma, i cili bëri një pritje vendimtare ndaj Mbeumo.

Man United në anën tjetër duket sërish në krizë edhe këtë sezon, ku janë lëkundur seriozisht pozitat e trajnerit Amorim.

Në krye të Premier League vijon Liverpool, i cili është dhe ekipi më në formë, që regjistron 12 pikë në 4 duelet e para. Një fitore pa shkëlqim ajo ndaj Burnleyt, ku kampionët në fuqi të Anglisë gjetën golin e vetëm të përballjes në minutën e 95′, me Salah që ekzekutoi saktë një 11-metërsh. Për vendasit pjesë e sfidës u bë edhe sulmuesi shqiptar Armando Broja, por që pati pak kohë në dispozicion për të lënë gjurmë. Sa i përket renditjes, Liverpool qëndron i pari, i ndjekur nga Arsenal, Tottenham, Bournemouth dhe në vendin e pestë Chelsea.