Mandati i deputetes Olta Xhacka, Çuçi: Do i kërkojmë opinion Komisionit të Venecias

Kreu i Grupit Parlamentar të Partisë Socialiste, Bledi Çuçi, është shprehur se mazhoranca ka diskutuar që t’i kërkojë opinion përfundimtar Komisionit të Venecias lidhur me mandatin e deputetes Olta Xhaçka.

Komentet Çuçi i bëri gjatë fjalës së tij në një mbledhje ku ai paraqiti bilancin e punës për sesionin parlamentar që lamë pas.

Deklaratat e Çuçit vijnë pasi Gjykata Kushtetuese kërkoi për herë të dytë nga Kuvendi heqjen e mandatit të deputetes Xhaçka.

Ai tha gjithashtu se ka një konflikt kushtetues dhe paqartësi për këtë çështje.

“Është krijuar një paqartësi në lidhje me faktin nëse do duhet që një deputet apo të gjithë deputetët duhet te votojnë në një formë të caktuar apo jo. Ky është një debat që nuk ka gjetur trajtim as nga vendimi i Gjykatës Kushtetuese.

Gjykata Kushtetuese ka tentuar të trajtojë një normë të re, gjë që nuk ja lejon Kushtetuta. Vullneti është sovran i çdo deputeti, Kushtetuta njeh pavarësinë e deputetit për të votuar në një mënyrë që ai e gjykon.

Ne kemi vendosur ta zgjidhim këtë ngërç duke i kërkuar interpretim përfundimtar komisionit të Venecias. Ky është një debat kushtetues që duhet të marrim një interpretim.

Kemi diskutuar brenda grupit që ne duhet t’i kërkojmë një opinion Komisionit të Venecias për këtë gjë, presim ta formalizojmë dokumentin.

Gjykata Kushtetuese e ka pasur hapësirën për ta adresuar këtë çështje, në mënyrë që të merrte një vendim përfundimtar.

Ka një konflikt kushtetues për këtë çështje. Jam i pavarur, do votoj si të ma dojë mendja mua”, ka thënë Çuçi.

LEXONI GJITHASHTU:

• Xhaçka: Bashkëshorti im nuk ka marrë asnjë m2 tokë nga shteti
• “Beleri i përket drejtësisë”, Xhaçka i përgjigjet Greqisë: Jo çështje e 2 qeverive