Manjani: Nuk mund të jetë shpresa te ODIHR për të rrëzuar qeverinë

Juristi, Ylli Manjani i ftuar në “Now me Erla Mëhillin” në Euronews Albania ka komentuar raportin e OSBE/ODIHR lidhur me zgjedhjet e 11 majit. Manjani u shpreh se në Shqipëri prej vitesh zgjedhjet nuk zgjidhen në kutitë e votimit. Ai theksoi se qeveria nuk mund të rrëzohet se thotë OSBE/ODIHR.

Sipas tij edhe reforma nuk është zgjidhje. Manjani u shpreh se edhe po u ndryshua ligji raporti do të jetë i njëjtë teksa theksoi se në vendin tonë shkelen ligjet dhe askush nuk mban përgjegjësi.

“Të pretendosh se do të rrëzohet qeveria apo do të ndodhë rotacion në Shqipëri se thotë ODIHR, është idiotësi. Kush e mendon këtë është idiot. Kaq. Kush mendon ndërrimi i qeverive vjen nga jashtë është edhe më idiot, nuk ka lidhje me këtë vend, nuk njeh vendin.

Janë përralla që tregojnë politikanët për të vënë në gjumë njerëzit. Në qoftë se te gjitha që thotë raporti i OSBE/ODIHR, u mblodh një komision Zgjedhor dhe u ndërrua ligji, u zgjidh problemi? Jo sepse në një vend që shkelet ligji dhe nuk mban kush përgjegjësi prap do shkelet. Prap të njëjtin raport do të kesh. Ja edhe reforma nuk është zgjidhja”, tha ai.