Maqedoni e Veriut, BDI dhe LSDM fitojnë zgjedhjet e parakohshme në komunat e Shtipit dhe Pllasnicës

Të dielën Maqedonia e Veriut zhvilloi zgjedhje të parakohshme vendore në komunat e Shtipit dhe Pllasnicës. Pandemia bëri që pjesëmarrja të ishte e ulët.

Në Shtip, 74 kilometra në lindje të Shkupit, votuan 14,328 persona, ose thënë ndryshe 34.3 për qind, kurse në Pllasnicë, 100 kilometra në jug të Shkupit, morën pjesë 1,959 qytetarë, ose 39.54 për qind.

Dy komunat zhvilluan zgjedhjet për shkak se kryetarët e shkuar morën funksione të reja në qeveri.

Korrespondentja e Euronews Albania, Ferikan Iljazi tha se në komunën e Shtipit, një nga partitë kryesore të opozitës, VRMO-DPMNE i bojkotoi zgjedhjet, çka nxiti më tej pjesëmarrjen e ulët në votime.

“Megjithatë kjo komunë [Shtipi] mbetet e LSDM-së, e cila e kishte udhëhequr edhe me mandatin e shkuar. Tashmë LSDM-ja feston fitoren e Sashko Nikollov, ndërsa opozita e akuzon se ka rrezikuar shëndetin e qytetarëve duke nxitur zgjedhjet ë parakohshme në kohë pandemie,” – u shpreh Iljazi.

Për sa i përket komunës së Pllasnicës, ajo do të drejtohet nga Ali Jaoski, i BDI-së.

“Vëllai i ish-kryetarit, që ka lënë postin, do ta marrë drejtimin e Pllasnicës, pra vijon ta mbajë drejtimin kjo familje. Në Pllasnicë shumica janë të komunitetit turk dhe ata zakonisht përkrahen nga BDI-ja dhe sërish e kanë mbajtur pushtetit,” – u shpreh Iljazi.

Problemi kryesor i zgjedhjeve ishte pjesëmarrja e ulët. Ndërkohë që partitë u kufizuan në festimet që bënë për rezultatet.

Iljazi raportoi edhe për situatën e pandemisë në Maqedoni të Veriut, ku numri i vdekjeve dhe rasteve ditore mbetet i lartë.