Maqedonia e Veriut firmos nesër marrëveshjen për blerjen e 200 mijë vaksinave kineze

Maqedonia e Veriut firmos nesër marrëveshjen me autoritetet kineze për blerjen e 200 mijë vaksinave kundër COVID-19.

Ministri i Shëndetësisë, Venko Filipçe deklaroi se dozat e siguruara do të shërbejnë për vaksinimin e 100 mijë personave. Të parët do të vaksinohen punonjësit shëndetësorë dhe personat e moshuar mbi 70 vjeç.

Pikat e vaksinimit do të funksionojnë me kapacitet maksimal, konkretisht nga 2000 deri në 2500 vaksinime në ditë. Kjo vaksinë është e sigurt sikur edhe të gjitha vaksinat tjera”, – theksoi ministri i Shëndetësisë.

Sipas planit të ministrisë, në fazën e dytë do të vaksinohen personat mbi 65 vjeç, me pas ata të moshës nga 18 deri 64 vjeç dhe që vuajnë nga sëmundje të tjera.

Në këtë faze do të përfshihen në strategjinë e vaksinimit edhe farmacistët, stomatologët, gazetarët, si dhe punonjësit e institucioneve arsimore dhe në kopshte të fëmijëve.

Deri tani në Maqedoninë e Veriut janë infektuar me COVID 94.599 persona, ndërsa 2.916 persona kanë humbur jetën.