Maqedonia e Veriut regjistron 33 viktima në 24 orë nga COVID-19

Maqedonia e Veriut ka shënuar sërish numër të lartë infektimesh dhe viktimash nga covid-19. 946 të prekur dhe 33 viktima në 24 orët e fundit kanë bërë që qeveria t’i kërkojë Kuvendit zgjatjen me 6 muaj të gjendjes së krizës, e cila përfundon më 19 dhjetor.

Deri tani RMV numëron 1 825 viktima ndërsa referuar numrit të vdekjeve për 1 milion banorë, Maqedonia e Veriut renditet në vendin e 8 në botë. Në total numri i të infektuar në Maqedoninë e Veriut, që prej fillimit të pandemisë, ka shkuar në gati 64 mijë persona.

Gjatë 24 orëve të fundit janë kryer 2564 teste dhe 946 raste të reja të Covid -19. Ndërkohë, Instituti i Shëndetit Publik regjistroi 789 pacientë të rikuperuar.

Deri më tani, në RMV janë kryer gjithsej 337.862 teste të Covid-19, ku numri i përgjithshëm i rasteve të diagnostikuara që nga fillimi i pandemisë është gati 64 mijë persona. Nga këta numri i pacientëve të rikuperuar është gati 41 mijë kurse numri i rasteve aktive është mbi 21 mijë.