Mbappe “kërcënon” Bayernin, të mërkurën luhet ndeshja e kthimit

Kylian Mbappe është padyshim sulmuesi i momentit në futbollin botëror, teksa tashmë gëzon dhe statusin si golashënuesi më i mirë në historinë e PSG.

24-vjeçari po kalon një formë fantastike në kampionatin francez, ndërsa kërkon të njëjtin sukses dhe në Ligën e Kampionëve.

Në prag të sfidës vendimtare ndaj Bayernit të Mynihut, Mbappe pohon se ndihet i kënaqur me arritjet e deritanishme.

“Luaj për të bërë historinë dhe gjithmonë e kam shprehur se dua ta realizoj në Francë, me klubin tim të zemrës, PSG-në. Ndjenjë e veçantë të jesh në krye në spektrin e golave në moshë kaq të re. E dashuroj gjithçka që mbart ky ekip dhe më motivon të jap më të mirën edhe në vazhdimësi,” – u shpreh ai.

Më tej ylli i sulmit të gjelave ka kërcënuar në një farë mënyre bavarezët, teksa synon të shënojë tripletë.

“Dëshiroj të shënoj 3 apo më shumë gola në kuadratin e bavarezëve dhe të hipotekojmë çështjen ‘kualifikim’. Të gjithë jemi koshientë se sa të fortë janë në fushën e vet, por kjo nuk nënkupton se është mision i pamundur. Mjafton të shikojmë situata të caktuara, kur kemi vënë në shërbim gjithë potencialin tonë dhe kemi arritur të japim shfaqje të jashtëzakonshme,” – tha Mbappe.

Përballja mes Bayernit dhe PSG-së luhet të mërkurën në Allianz Arena, ndërsa sfida e parë u fitua nga gjermanët me rezultatin 1-0.

LEXONI GJITHASHTU:

• Supersfida PSG-Bayern, francezët rikuperojnë dyshen Messi-Mbappe
• Mbappe vendos rekord, golashënuesi më i mirë në histori për PSG