Me rritjen e infektimeve pediatria i afrohet limitit të kapaciteteve

Në pediatri dhe në qendrat shëndetësore ditëve të fundit ka pasur një fluks të shtuar të fëmijëve të sëmurë. Mjekët thonë se shumica e tyre rezultojnë të prekur nga coronavirusi.

Fluks prindërish që presin të vizitojnë fëmijët si ne pediatri ashtu edhe në qendrat shëndetësore.

Euronews Albania ishte në qendrën shëndetësore numër 8 në Tiranë, e cila së bashku me qendrat numër 6,7 dhe 10, funksionon për 24 orë shërbimi i urgjencës pediatrike.

Çdo ditë në këtë qendër paraqiten rreth 180 pacientë që dyshojnë të jenë prekur me covid dhe I nënshtrohen testimit.

Sipas mjekes Blerta Berberi pjesa më e madhe e testuarve me COVID-19 janë fëmijë.

“Gjatë këtyre ditëve kemi pasur një fluks shumë të madh të pacientëve që janë paraqitur për të marrë ndihmë mjekësore. Ky fluks ka qenë i njëjtë si për moshat e rritura ashtu dhe për moshën pediatrike, veçanërisht për atë pediatrike”, thotë ajo.

Pavarësisht se fluksi është shpërndarë edhe në qendrat shëndetësore, përveç urgjencës pediatrike, sërish prindërve u duhet të presin në radhe për disa orë.

“E sollëm për temperaturë, ftohje. E kanë marrë mjekët në vëzhgim”, thotë një prind.

Mjekja Berberi thotë se varianti mbizotërues është Omicroni.